Sioe Amaethyddol Llanilar

Cynhelir Sioe Llanilar ar yr ail ddydd Sadwrn o fis Awst bob blwyddyn ac mae’n denu ceisiadau ar gyfer maes, cynnyrch, celf a chrefft o bob cwr o’r sir. Er mai digwyddiad amaethyddol a garddwriaethol yw’r Sioe yn bennaf, mae yna ddigwyddiadau eraill sy’n boblogaidd iawn gyda’r cyhoedd, megis y sioe gwn yn ogystal â’r gystadleuaeth neidio clwydi ceffylau.

Neges y Llywydd

Wythnosau cyn y Sioe y llynedd roedd pawb yn galaru am golli Hugh Tudor. Roedd y llyfryn wedi ei hargraffu ymhell cyn hynny, felly mae’n iawn talu teyrnged i Hugh yn awr. Roedd yn un o gymeriadau mawr bywyd ac yn wir arweinydd ein cymuned leol. Roedd ei wybodaeth am ffermio, materion gwledig a’i restr anhygoel o gysylltiadau yn ei wneud yn aelod amhrisiadwy o Bwyllgor y Sioe; ni weithiodd neb yn galetach i sicrhau llwyddiant y Sioe. Roedd y golled fwyaf wrth gwrs, i Ann, Sara, Lowri a holl deulu Hugh.

Does dim dwywaith y bydd Hugh yn edrych lawr arnom ni heddiw, gyda gair neu ddau o gyngor yn barod, ond hefyd y pefrith yn ei lygaid a’r hwyl yn ei galon y daethom ni i gyd i garu cymaint. Roedd ganddo’r ddawn wych honno o beidio byth â chymryd dim byd o ddifrif, yn enwedig ei hun!

Penblwydd pwysig eleni; mae Castle Hill yn 250 oed – wedi ei adeiladu yn 1775. Mae Sioe Llanilar wedi cael ei chynnal ers tua hanner yr amser hwnnw. Ar ôl gwaith adnewyddu helaeth ychydig o flynyddoedd yn ôl, ymddengys yr “hen wraig” yn hapus! Efallai bod hynny hefyd oherwydd genedigaeth Edward, plenty cyntaf Peter a Meg ar Nos Galan 2024.

Y bygythiad diweddaraf i ffermio yw Treth Fferm y Teulu, ac mae’n enfawr. Ond mae digwyddiadau yn mynd a dod, tra bod pethau da yn parhau. Pethau fel Sioe Llanilar.

Mwynhewch eich diwrnod!

Patrick Loxdale

Neges y Cadeirydd

Mae’n bleser eich croesawu unwaith eto i Sioe Llanilar. Llynedd cafwyd sioe arbennig o lwyddiannus gyda thywydd ffafriol a chystadlu brwd. Braint o’r mwyaf hefyd oedd cael croesawu a chynnal Sioe Genedlaethol Cymdeithas y North Country Cheviots. Ond mi roedd yna gwmwl tywyll dros y sioe wedi i ni golli’n ddisymwth un o hoelion wyth pwyllgor y sioe sef Hugh Tudor, Tynberllan.

Ein gwestai anrhydeddus eleni yw Mrs Nellie Davies, Ffosbompren. Mae teulu Ffosbompren (Ceffylau Ilar Stud) wedi bod ynghlwm â’r Sioe wrth gystadlu a’i chefnogi ers blynyddoedd lawer ac yn sicr mae Mrs Davies yn llwyr haeddiannol o’r anrhydedd hwn.

Hon yw fy ail flwyddyn fel Cadeirydd y Sioe ac rwyf yn hynod o ffodus a diolchgar i gael cydweithio gyda swyddogion a phwyllgor ymroddgar a brwdfrydig sy’n gweithio’n ddiwyd i sicrhau ein bod yn cynnal sioe lwyddiannus yn flynyddol.

Hoffwn hefyd gymryd y cyfle i ddiolch i’r stiwardiaid, beirniaid, casglwyr a phawb sy’n cynorthwyo am eu gwaith diflino a’u parodrwydd i roi o’u hamser i gefnogi’r Sioe.

Dymunaf bob llwyddiant i Sioe 2025 ac edrychaf ymlaen at eich gweld chi gyd yma yn Llanilar ar gaeau Castle Hill ym mis Awst.

Meirion Davies